Prins Stef I nuje veurgenger van V.V. De Hopsjlokkers

Op zónjig 7 jannewarie is tiedes ’n gezellig drök Prinsematinee Prins Stef I (Stef Speijcken) es 70ste Prins van V.V. De Hopsjlokkers oetgerope. Ónger ’t motto “Op Vólle Toere” zal Prins Stef I flink gaas gaon gaeve deze vastelaovindj. Prins Stef I haet zien prinselik pelies op Kroppesjtraot 20 same mit zien maedje Irene en zien twee dochters Lizzy en Lara. In ’t dageliks laeve is Prins Stef verkouper biej Collomix GmbH oet Beiere, wo d’r nao eige zègke allein mer op kantoor kump es d’r Oktoberfest is of es ’t op de Kers aan geit. Verder is d’r gaer sjportief bezig biej de veterane van DES same mit Prins Roel I van V.V. De Fobmötse of geit d’r mountainbike mit Prins Rochér I van C.V. De Kwekkerte. Jaore haet d’r oppe plenk gesjtange es Vóttevaeger en ouch biej de Zjwamer Revu haaj d’r ein ról. In de jaore 90 woor d’r ouch te zeen in de Zjwamer sjpeelfilm Knjørpjøt. Prins Stef I waert óngersjteund door zien adjudante Dennis Richter en Dirk Julicher, die ‘m dit sezoen de vót nao moge drage. Veur winse Prins Stef I van herte perfisiat en ein sjentjig sjoon sezoen toe! De Prinseresepsie zal zin op zónjig 21 jannewarie óm 16.00 oer in Partycentrum De Mert. Veur neuje ederein oet óm de Prins, zien adjudante en zien gezin den ein hendje te kómme gaeve.